ഡൽഹി: തിരഞ്ഞെടുപ്പിനിടെ വീണ്ടും കോണ്ഗ്രസിന് തിരിച്ചടി. ഡൽഹി പിസിസി അധ്യക്ഷൻ അരവിന്ദർ സിംഗ് ലവ്ലി രാജി വച്ചു. സംഘടന തലത്തിലെ അതൃപ്തിയാണ് രാജിക്ക് കാരണം. കനയ്യ കുമാറിന്റെ സ്ഥാനാർത്ഥിത്വത്തിലടക്കം പ്രതിഷേധം. ഡൽഹിയുടെ ചുമതലയുള്ള എഐസിസി ജനറൽ സെക്രട്ടറിയുമായുള്ള തർക്കമാണ് രാജിവെക്കാൻ കാരണമെന്നാണ് രാജികത്തില് ലവ്ലി വ്യക്തമാക്കുന്നത്.
പിസിസി അധ്യക്ഷ സ്ഥാനം രാജിവച്ചുകൊണ്ട് കോണ്ഗ്രസ് അഖിലേന്ത്യ അധ്യക്ഷൻ മല്ലികാര്ജുൻ ഖര്ഗെക്കാണ് കത്ത് നല്കിയത്. 2023 ആഗസ്റ്റ് 31നാണ് ഡൽഹി പിസിസി അധ്യക്ഷനായി ലവ്ലിയെ നിയമിക്കുന്നത്. കഴിഞ്ഞ എട്ടുമാസമായി പാര്ട്ടി ഏല്പ്പിച്ച ഉത്തരവാദിത്വം വഹിക്കാനായതില് സന്തോഷമുണ്ടെന്നും രാജികത്തില് പറയുന്നുണ്ട്. രാജിവെക്കാനുള്ള കാരണങ്ങളും രാജി കത്തില് വിശദമായി പറയുന്നുണ്ട്. മെയ് 25നാണ് ഡൽഹിയില് ലോക്സഭ തെരഞ്ഞെടുപ്പ് നടക്കുന്നത്. തെരഞ്ഞെടുപ്പ് നടക്കാനിരിക്കെ പിസിസി അധ്യക്ഷൻ രാജിവച്ചത് കോണ്ഗ്രസിന് വലിയ തിരിച്ചടിയായി മാറിയിരിക്കുകയാണ്.
