ബ്രിസ്ബേൻ: ഓസ്ട്രേലിയക്കെതിരായ രണ്ടാം ടെസ്റ്റിൽ വെസ്റ്റ് ഇൻഡീസിന് എട്ട് റൺസിന്റെ വിജയം. ഏഴ് വിക്കറ്റെടുത്ത ഷാമർ ജോസഫിന്റെ മിന്നും ബൗളിങ്ങാണ് ടീമിന് വിജയം നേടിക്കൊടുത്തത്.
27 വർഷത്തിനുശേഷമാണ് ആസ്ത്രേലിയൻ മണ്ണിൽ വെസ്റ്റ് ഇൻഡീസ് ടെസ്റ്റ് മത്സരത്തിൽ ജയിക്കുന്നത്. സ്കോർ: വെസ്റ്റ് ഇൻഡീസ് 311-10, 193-10. ആസ്ത്രേലിയ 289-9(ഡിക്ലയർ), 207-10.
രണ്ടാം ഇന്നിങ്സിൽ 216 റൺസായിരുന്നു ജയിക്കാൻ വേണ്ടിയിരുന്നത്. 60-2 എന്ന നിലയിലാണ് നാലാം ദിനം ആതിഥേയർ ബാറ്റിങ് ആരംഭിച്ചത്. സ്റ്റീവ് സ്മിത്തും കാമറൂൺ ഗ്രീനുമായിരുന്നു ക്രീസിൽ. ടീം സ്കോർ 113ൽ എത്തിനിൽക്കെ കാമറൂൺ ഗ്രീൻ 42 റൺസെടുത്ത് പുറത്തായതോടെ ഓസ്ട്രേലിയയുടെ തകർച്ച തുടങ്ങി.
