ഹൈദരാബാദ്: ഇന്ത്യൻ സ്പിന്നർമാരായ ആർ. അശ്വിനും രവീന്ദ്ര ജദേജയും ടെസ്റ്റ് ക്രിക്കറ്റിൽ റെക്കോഡ്. ടെസ്റ്റിൽ ഇന്ത്യക്കായി ഏറ്റവും കൂടുതൽ വിക്കറ്റുകൾ നേടുന്ന ബൗളിങ് ജോഡികൾ എന്ന നേട്ടമാണ് ഇരുവരും സ്വന്തമാക്കിയത്.
ഹൈദരാബാദിൽ ഇംഗ്ലണ്ടിനെതിരായ ഒന്നാം ടെസ്റ്റിന്റെ ആദ്യദിനമാണ് ഇരുവരും അപൂർവ നേട്ടം സ്വന്തമാക്കിയത്. മത്സരത്തിൽ ഇരുവരും കൂടി ആറു വിക്കറ്റുകളാണ് നേടിയത്. സ്പിൻ കെണിയിൽ വീണ ഇംഗ്ലണ്ടിന്റെ ഒന്നാം ഇന്നിങ്സ് 246 റൺസിൽ അവസാനിച്ചിരുന്നു. ഇംഗ്ലണ്ടിന്റെ എട്ടു വിക്കറ്റുകളും വീഴ്ത്തിയത് സ്പിന്നർമാരാണ്. അക്സർ പട്ടേലും രണ്ടു വിക്കറ്റ് നേടിയിരുന്നു.
ബാക്കിയുള്ള രണ്ടു വിക്കറ്റ് ജസ്പ്രീത് ബുംറയും വീഴ്ത്തി. അനിൽ കുംബ്ലെ-ഹർഭജൻ സിങ് ജോഡികളുടെ 501 വിക്കറ്റ് എന്ന റെക്കോഡാണ് അശ്വിനും ജദേജയും റെഡ്-ബാൾ ഫോർമാറ്റിൽ മറികടന്നത്. അശ്വിൻ-ജദേജ ജോഡികളുടെ പേരിൽ 502 വിക്കറ്റുകളായി. അന്താരാഷ്ട്ര ക്രിക്കറ്റിൽ ഏറ്റവും കൂടുതൽ വിക്കറ്റുകൾ നേടിയ ജോഡികൾ ഇംഗ്ലണ്ടിന്റെ ജെയിംസ് ആൻഡേഴ്സണും സ്റ്റുവർട്ട് ബ്രോഡുമാണ്. 138 മത്സരങ്ങളിൽനിന്നായി 1039 വിക്കറ്റുകൾ.#jadeja
