കൊട്ടിയം: കടയിൽ അതിക്രമിച്ച് കയറി യുവതിയെ ആക്രമിച്ച പ്രതികൾ പിടിയിലായി. നെടുമ്പന ചരുവിള പുത്തൻവീട്ടിൽ സുമേഷ് (38), പഴങ്ങാലം പുഷ്പംവിളവീട്ടിൽ പ്രദീപ് (45), നെടുമ്പന മനു ഭവനിൽ മനു (35), ചാമവിള സൗമ്യഭവനിൽ സദാശിവൻ മകൻ സജിത് (36) എന്നിവരാണ് കണ്ണനല്ലൂർ പൊലീസിന്റെ പിടിയിലായത്. പ്രതികൾ അനധികൃതമായി മദ്യകച്ചവടം നടത്തുന്ന വിവരം യുവതി പൊലീസിൽ അറിയിച്ച വിരോധത്തിലാണ് ആക്രമണം.
യുവതി ജോലി ചെയ്യുന്ന കടയിൽ അതിക്രമിച്ച് കയറിയ പ്രതികൾ യുവതിയെ മർദിക്കുകയും തടയാൻ ശ്രമിച്ച കടയുടമയായ സ്ത്രീയെ അസഭ്യം പറഞ്ഞ് ആക്രമിക്കുകയുമായിരുന്നു. തുടർന്ന് പ്രതികൾ കടയിലുണ്ടായിരുന്ന സാധനങ്ങൾക്ക് കേടുപാടുകൾ ഉണ്ടാക്കുകയും ചെയ്തു.
യുവതിയുടെ പരാതിയുടെ അടിസ്ഥാനത്തിൽ കണ്ണനല്ലൂർ പൊലീസ് പ്രതികളെ അറസ്റ്റ് ചെയ്യുകയായിരുന്നു. കണ്ണനല്ലൂർ ഇൻസ്പെക്ടർ വിനോദ്കുമാറിന്റെ നേതൃത്വത്തിൽ എസ്.ഐ ഗോപകുമാർ, സി.പി.ഒ നജുമുദ്ദീൻ, ഓർവെൽ എന്നിവർ ഉൾപ്പെട്ട സംഘമാണ് ഇവരെ അറസ്റ്റ് ചെയ്തത്.#assaulting
