വോട്ടർമാരെ സ്വാധീനിക്കാൻ എത്തിച്ചതെന്ന് സംശയിക്കുന്ന കിറ്റുകൾ പിടികൂടി; പിന്നിൽ ബിജെപിയെന്ന് എൽഡിഎഫും യുഡിഎഫും

വയനാട്: ബത്തേരിയിൽ വോട്ടേഴ്‌സിനെ സ്വാധീനിക്കാൻ എത്തിച്ചതെന്ന് സംശയിക്കുന്ന അവശ്യസാധനങ്ങൾ അടങ്ങിയ 1500ഓളം കിറ്റുകൾ പിടികൂടി.. കിറ്റുകൾ എത്തിച്ചതിന് പിന്നിൽ ബിജെപിയാണെന്ന് എൽഡിഎഫും യുഡിഎഫും ആരോപിച്ചു. വാഹനത്തിൽ കയറ്റിയ നിലയിലാണ് കിറ്റുകൾ പിടികൂടിയത്. രാത്രിയോടെയാണ് രഹസ്യവിവരത്തിന്റെ അടിസ്ഥാനത്തിൽ കിറ്റുകൾ നിറച്ച വാഹനം പൊലീസ് കസ്റ്റഡിയിലെടുത്തത്. ഇവ തെരഞ്ഞെടുപ്പ് ഫ്‌ളൈയിംഗ് സ്‌ക്വാഡിന് കൈമാറുമെന്ന് ബത്തേരി പൊലീസ് അറിയിച്ചു.
ആവശ്യസാധനങ്ങൾക്കൊപ്പം വെറ്റിലയും ചുണ്ണാമ്പും അടക്കമുള്ള വസ്തുക്കളും ബത്തേരിയിലെ മൊത്ത വിതരണ സ്ഥാപനത്തിന് മുന്നിൽ നിന്ന് പിടിച്ചെടുത്ത കിറ്റുകളിൽ ഉണ്ട്. ആദിവാസി കോളനികളിൽ വിതരണം ചെയ്യാൻ ബിജെപി തയ്യാറാക്കിയതാണ് കിറ്റുകൾ എന്ന് ആരോപണം. നേരത്തെ 800 കിറ്റുകൾ കൂടി കയറ്റി പോയിരുന്നതായും ആരോപണം ഉണ്ട്. അതേസമയം, എവിടേക്ക് നൽകാനുള്ളതാണെന്ന് അറിയില്ല എന്നാണ് കിറ്റുകൾ കയറ്റിയ ലോറിയുടെ ഡ്രൈവർ നൽകിയ മൊഴി.